*ကျွန်တော် ရေးခဲ့ဖူးသော ကွန်မန့်အတိုအထွာများ*

http://www.laylwintnaythu.co.cc/2009/02/blog-post_09.html
၎င်းပို့စ်နှင့် ပတ်သတ်၍ ရေးခဲ့သော ကွန်မန့်လေးပါ..။

1) ဒီလိုပါပဲ ကိုရဲရာ.. လူတွေကတော့ တစ်ယောက်နဲ့ တစ်ယောက် ဘယ်တူပါ့မလဲလေ.. လူလို့ အမည်ခံကြပေမယ့် လူလိုမသိတဲ့လူတွေက လောကမှာ အများသား... ဒါကြောင့်လည်း မရှိတာထက်၊ မသိတာခက်၊ မသိတာထက် သိလျက်နဲ့ မကျင့်တာခက်လို့ ဒီစကားလေး ပေါ်လာတယ် ထင်ပါ့...

ဘာပဲပြောပြော လူပေါင်းစုံ ရှိရင်တော့ စရိုက်ကတော့ ပေါင်းစုံရှိမှာပါပဲ.. ရှိနေတာပဲ... နောင်လည်း ရှိနေဦးမှာပဲ... ဒါက ဘုရားလက်ထက်က စလို့ လောကဓမ္မတာ ပဲလို့ ကျွန်တော်ထင်ပါတယ်... ဒီလို အသိမရှိတဲ့ လူတိုင်းကို လိုက်ပြုပြင်လို့ကတော့ သက်တမ်းသာကုန်သွားမယ်... သူတို့ကတော့ ပန်းပန်လျက်ပါပဲလို့ လုပ်နေမလားပဲ...

လူတိုင်းကိုတော့ ပြုပြင်လို့ မရနိုင်ပေမယ့်... ပြုပြင်လို့ ရတာတစ်ခုတော့ ရှိတယ်.. အဲဒါဘာလဲဆိုတော့ ကိုယ်ကိုယ်တိုင် အဲဒီထဲ မပါအောင်ပေါ့... ဆရာတော် ရာဇိန္ဒ (ရဝေနွယ်-အင်းမ) ဆုံးမထားတဲ့ စကားလေးနှစ်ခွန်း ညီဒီနေရာက မျှဝေလိုက်ပါ့မယ်...

၁။ လူတစ်ယောက်က ကိုယ့်အပေါ်ဖြစ်ဖြစ် သူတစ်ပါးအပေါ်ဖြစ်ဖြစ် မကောင်းတာလုပ်ပြီဆို သူ့ကို အရင် အပြစ်မတင်ဘဲ ကိုယ့်မှာကော အဲသလို စရိုက်မျိုး အကျင့်မျိုး ရှိသလားလို့ ဆင်ခြင်ရမယ်...ရှိနေရင် ပြင်ရမယ်... တဲ့။

နောက် ဆုံးမစကား တစ်ခွန်းက

၂။ သူတစ်ပါး ကောင်းတာ မကောင်းတာကို ဝေဖန်နေရမယ့်အချိန် မဟုတ်တော့ပါဘူး၊ ကိုယ်ကောင်းအောင်ပဲ နေရမယ့်အချိန် ဖြစ်နေပါပြီ၊ ဘာဖြစ်လို့လည်းဆိုတော့ သေဖို့က တဖြည်းဖြည်း နီးလာပြီလေ… တဲ့

ကျွန်တော့်ဆီ စာတွေလာဖတ်လို့ ကျေးဇူးပါ ကိုရဲ…

ဖတ်မှတ်ပြီး ရရှိသွားတဲ့ တရားအသိတွေကို လက်တွေ့မှာ အသုံးကျအောင် အသုံးချတတ်ပါစေ… ကျန်းမာရွှန်လန်းပါစေ…။
တရားနှလုံးသွင်းပြီး ကောင်းမြတ်အေးချမ်းတဲ့ နေ့ရက်လေးတွေကိုလည်း နေ့စဉ်ရက်ဆက် ပိုင်ဆိုင်နိုင်ပါစေ ခင်ဗျာ…

လေးစားစွာဖြင့်
ဖိုးသား

****************************

http://thitsaralin.blogspot.com/
၎င်းဘလော့လေးကို ဖတ်ရင်း ဒီလိုလေးလည်း ရေးခဲ့ဖူးပါတယ်…။

2) တီလေးရေ… မင်္ဂလာပါ


ဖိုးသား လာဖတ်သွားပါတယ်… ဖိုးသားလည်း ပိုင်းလော့ဆရာတော် ဘုရားကြီးရဲ့ တရား တစ်ပုဒ်လားပဲ နာဖူးပါတယ်… ၂၀၀၆ ကုန်ခါနီးလောက်ကပါ.. ဗိုလ်တစ်ထောင် ဘုရားပွဲမှာ… ဒါပေမယ့် တရားခေါင်းစဉ် *ခင်ပွန်းကြီး ၁၀ ပါး ကန်တော့ခန်း*နဲ့ *အချိန်တိုင်းတွေးနေရင်း ဘ၀ပြောင်းနေသည်* ဆိုတဲ့ စကားလေးကိုတော့ ယနေ့တိုင် မှတ်မိနေဆဲပါ တီလေး…

ခုလိုလွယ်ကူ နားလည်လွယ်အောင် ရေးသားပေးလို့လည်း တီလေးကို ကျေးဇူးတင်ပါတယ်…

တီလေးကျန်းမာပါစေ…

လေးစားရိုသေစွာဖြင့်
ဖိုးသား

********************************************

ဒါကတော့ ဘုန်းဘုန်း ၀ိစိတ္တ ဘလော့က ဒီပို့စ်လေးကို ဖတ်မိရင်း ရေးခဲ့ဖူးတာပါ..။ ဘုန်းဘုန်း ပြန်ဖြေထားတာကိုလည်း အဲဒီ့ပို့စ်ရဲ့ ကွန်မန့်ထဲမှာပဲ ဆက်လက် ဖတ်ရှုလို့ ရပါတယ်ခင်ဗျာ...။
http://phonephonevi.blogspot.com/2009/02/blog-post_22.html

3) ဘုန်းဘုန်း မင်္ဂလာပါ... (ဘုန်းဘုန်းဝိစိတ္တ)

စေတနာသုံးတန်ပို့စ်လေး ဖတ်အပြီးမှာ ဖိုးသားစိတ်ထဲ ဘ၀င်မကျတာလေး ပေါ်လာလို့ပါ... ဒါလေးနဲ့ပတ်သတ်လို့...

>>> “အလှူခံပုဂ္ဂိုလ်ပိုင်းကို သေချာရွေးချယ်ပြီး မလှူပါက ကိုယ့်အလှူကို ခံယူတဲ့အလှူခံ ပုဂ္ဂိုလ်ရဲ့ အမူအရာ၊ အပြောအဆို၊ အနေအထိုင်၊ အကျင်သီလတွေကို ကြည့်ပြီးသဒ္ဓါတရား ပျက်တတ်ပါတယ်။ သူသူကိုယ်ကိုယ် ကိုယ်လှူထားတဲ့ အရာလေးတွေကို ကြည့်ပြီးပီတိပွားချင်ကြ၊ ၀မ်းမြောက်ချင်ကြတာ ဓမ္မတာပါ။ အဲဒီလို ပီတိပွားနိုင်ဖို့အတွက် အလှူခံပုဂ္ဂိုလ်၊ နေရာဌာနစတာတွေကို ရွေးချယ်လှူတန်းတတ်ဖို့ လိုပါတယ်။” <<< ဖိုးသား ဘ၀င်မကျတာက ရွေးချယ်လှူဆိုတဲ့ အသုံးအနှုန်းလေးပါ... ဘုန်းဘုန်း ဒီပို့စ်ရေးတဲ့ ရည်ရွယ်ချက်ကို ဖိုးသားနားလည်ပါတယ်... အပရစေတနာ အပြည့်အ၀ရစေဖို့ အလှူခံပုဂ္ဂိုလ် ရွေးချယ်ပြီး လှူခိုင်းတယ်ဆိုတာ... ဒါပေမယ့် ဖိုးသား သိထားတာလေး တစ်ခုရှိပါတယ်... အလှူဒါန တစ်ခု ပြုတဲ့နေရာမှာ ကုသိုလ်နဲ့ ပါရမီနဲ့ ကွဲပြားတာလေး...

ပုဂ္ဂိုလ် ယုတ်မြတ်ရွေးချယ်အပ် ခေါ်အပ်ကုသိုလ်သာ၊
ပုဂ္ဂိုလ် မရွေးလှူဒါန်းပေး မှတ်ရေးပါရမီ။

ဘုန်းဘုန်းက အလှူခံပုဂ္ဂိုလ် ရွေးချယ်ပြီး လှူခိုင်းတော့ ကုသိုလ်ကို အဓိက မထားဘဲ ပါရမီအတွက် ဖြည့်ကျင့်နေတဲ့ သူမျိုးအတွက်ကျတော့ အမှတ်မှားစရာ ဖြစ်နိုင်မလားလို့ ဖိုးသားယူဆမိပါတယ်... ဖိုးသားလည်း သေသေချာချာတော့ နားမလည်ပါဘူး... သိထားတာလေးနဲ့ မကိုက်လို့ ရေးလိုက်ရခြင်းပါ...

ဘုန်းဘုန်းအပေါ် ဆရာလုပ်တဲ့ ပုံစံမျိုး ဖြစ်သွားခဲ့ရင်၊ ဒါမှမဟုတ် အပေါ်က ရေးသားခဲ့တဲ့အထဲမှာ မောက်မာတဲ့ သဘောမျိုး ပါသွားခဲ့ရင် ဖိုးသား ဒီနေရာကပဲ ရှိခိုးဦးချ တောင်းပန်ပါရစေ... ခွင့်လွှတ်ပေးပါ ဘုန်းဘုန်း...

လေးစားရိုသေစွာ ဦးခိုက်လျက်
ဖိုးသား

*******************************

ဒါလေးလည်း ဘုန်းဘုန်းဝိစိတ္တ ဘလော့မှာ ရေးခဲ့ဖူးတာပါပဲ.. ဒီပို့စ်လေးနဲ့ ပတ်သတ်လို့...။
4) မင်္ဂလာပါ ဘုန်းဘုန်း

ဖိုးသားလည်း အနီးဝေးနဲ့ ပတ်သတ်ပြီး ကဗျာ တစ်ပုဒ် ရေးဖူးတယ်… ဘုန်းဘုန်းခုရေးတဲ့ သဘောတရားနဲ့တော့ မတူဘူး ထင်တယ်…။ သိထားတာလေးနဲ့ စိတ်ထဲပေါ်လာတာလေးကို စပ်ဆက်ပြီး ရေးထားတာပါ… ဖတ်ကြည့်ပေးပါဦး ဘုန်းဘုန်း…။

*ဆန့်ကျင်နေ၏၊ သို့သော်…*

ယောကျာ်းနဲ့ မိန်းမ
အချစ်နဲ့ အမုန်း
အဆုံးနဲ့ အစ
အဖြူနဲ့ အမည်း
ရန်သူနဲ့ မိတ်ဆွေ

လောဘနဲ့ အလောဘ
ဒေါသနဲ့ အဒေါသ
မောဟနဲ့ အမောဟ

အနိစ္စနဲ့ နိစ္စ
ဒုက္ခနဲ့ သုခ
အနတ္တနဲ့ အတ္တ
သုဘနဲ့ အသုဘ

လူမိုက်နဲ့ ပညာရှိ
သညာသိနဲ့ ပညာသိ
သင်္ခတနဲ့ အသင်္ခတ
--- --- ---
--- --- ---
သူတို့ဤသို့ ရှိကြ၏။

ပြောသံကြားတယ်
မျဉ်းပြိုင်နှစ်ကြောင်း
မပေါင်းဆုံနိုင်တဲ့
သင်လက်ခံသလား???

မျဉ်းပြိုင်နှစ်ခု
ထပ်တူပြုလိုက်ရင်တော့
ပေါင်းဆုံသွားပြီပေါ့၊
ခရီးတစ်ခုကို
အတူယှဉ်ပြီး
ချီတက်နိုင်ပြီပေါ့။

ဘာကြောင့်ပါလိမ့်
နီးနီးလေးနဲ့ ဝေးနေလို့။
ဝေးနေသော်လည်း နီးနေဆဲ။ ။

လေးစားစွာဖြင့်
ဖိုးသား

20.12.2008, SAT:, 09:14:14 pm


ဒီလိုပညာပေး၊ အသိဉာဏ်ပေး တရား ဆောင်းပါးတွေ ရေးပေးနေလို့၊ နောက် ဖိုးသားတို့လည်း ဖတ်ခွင့်ရလို့ ကျေးဇူးတင်ပါတယ် ဘုန်းဘုန်း…။ မြန်မာပြည်က လူတွေလည်း ဘုန်းဘုန်းပြောသလိုပဲ နီးနီးလေးနဲ့ ဝေးနေကြတယ်နော်…။ ဖိုးသားလည်း ဒီရုရှားရောက်လာတာပဲ ကံကောင်းတယ် ပြောရမယ်…။ ဘာသာတရားနဲ့ ပတ်သတ်ပြီး ဒီရောက်မှ လေ့လာခွင့်လည်းရ၊ မိတ်ကောင်းဆွေကောင်း တွေနဲ့လည်း တွေ့ကြုံရ၊ ဖိုးသားအတွက်တော့ တန်ဖိုး မဖြတ်နိုင်တဲ့ အရာတွေပါပဲ ဘုန်းဘုန်းရာ…။ ပြောရရင် ဝေးနေပေမယ့် တဖြေးဖြေး နီးလာတာပေါ့…။

ဖိုးသားလည်း ဆက်လက်နီးစပ်အောင် ကြိုးစားသွားပါ့မယ်..။ ကြိုးစားနေပါ့မယ်..။ ကြိုးစားလျက်ပါ။ လိုအပ်တာလေးတွေ၊ မှားနေတာလေးတွေ ရှိရင်လည်း ဖိုးသားကို သွန်သင်လမ်းညွှန်လို့ ဆုံးမပေးပါဘုန်းဘုန်း…။

ဘုန်းဘုန်းကျန်းမာပါစေ…။

လေးစားရိုသေစွာ ဦးခိုက်လျက်
ချစ်တပည့်လေး (ဘုန်းဘုန်းရဲ့ ဘလော့စာမျက်နှာက သွန်သင်လမ်းညွှန်တဲ့ တရားစာသားတွေ ဖတ်နေလို့ ဘုန်းဘုန်းလည်း ဖိုးသားရဲ့ သင်ဆရာ၊ မြင်ဆရာပါပဲ…။)
ဖိုးသား

****************************************

ဒီကွန်မန့်လေးကတော့ ညီလေး craton ရဲ့ *ငါမသေဘူး ရေကူးတတ်တယ်* ဆိုတဲ့ ပို့စ်လေးကို ဖတ်ရင်း ရေးခဲ့ဖူးတာပါ...။
http://craton-craton.blogspot.com/2009/02/blog-post_27.html

5) ညီရေ...

အခုမှပဲ ရေရေလည်လည် သဘောပေါက်တော့တယ်.. အစ်ကိုက ပထမ စာအရေးအသားကို သွားဖတ်နေမိလို့ နားမလည်တာ... အခု နောက်တစ်ခေါက် အရေးအသားကို ဘေးချိတ်လို့ သဘောတရားကို အရဖမ်းလိုက်တော့မှပဲ သေသေချာချာ နားလည်တော့တယ်... အစ်ကို နားလည်တာလေး ပြောကြည့်မယ်နော...

ညီက လောကဓံ ၈-ပါးနဲ့ ကြုံနေရတဲ့ ဘ၀ကနေ အားတင်း ရုန်းကန် ရေဆန်ကို ဆန်တက်တဲ့ အဓိပ္ပါယ်နဲ့ ရေးထားတယ် ထင်ပ၊ ဒါက အစ်ကိုထင်တာနော်... အားတင်းထားညီရေ.. ရေဆန်ကို လှော်တက်ရာမှာ... တက်ကိုတော့ မလွတ်စေနဲ့... အားပြင်းပြင်းနဲ့လှော်ထား... တစ်နေ့တစ်လံ ပုဂံဘယ်မှ မရွေ့ပါဘူး ညီ.. တကယ်လို့ လှော်ခတ်ရင်း လမ်းခရီးမှာ တက်ကျိုးခဲ့ရင်တောင် တက်အစား လက်ထိုးလှော်ရလိမ့်မယ် ညီ.. ကိုယ်လိုချင်တဲ့ ပန်းတိုင်ကို အရောက် လှမ်းချင်ရင်ပေါ့ကွာ..

တော်သေးတာပေါ့ညီ.. ညီက ရေထဲကျတဲ့ အချိန် ရေကူးတတ်ပေလို့... တကယ်လို့ ရေများ မကူးတတ်ရင် ဘယ်လိုများဖြစ်မလဲလို့ အဆက်အစပ်မရှိ တွေးလိုက်မိသေးတယ်... နောက်တာ ညီရေ...

ကျန်းမာရွှင်လန်းပါစေညီ...
လိုရာပန်းတိုင် ကိုလည်း အားတင်းလှော်ခတ် မဟာဇနက္ကထုံး နှလုံးမူရင်း တစ်ဘက်ကမ်းကို အရောက် လှမ်းနိုင်ပါစေ...။

လေးစားခင်မင်စွာဖြင့်
ဖိုးသား

**********************************

လေးစားထိုက်သူများကို လေးစားလျက်
ဖိုးသား

01/03/2009, SUN:, 11:18:34 AM

!--READ-MORE-STARTS-->